२०७७ माघ १५, बिहिबार | Thu, 28, Jan, 2021

धनगढी प्रहरी हत्याकाण्डका मुख्य योजनाकार कारागार चलान

  • २०७७ पौष १७, शुक्रबार मा प्रकाशित ३ हफ्ता अघि
  • धनगढी प्रहरी हत्याकाण्डका मुख्य अभियुक्त सुक बहादुर भनिने अमर रानालाई पुर्पक्षका लागि कारागार चलान गरिएको छ।  बिहीबार जिल्ला अदालत कैलालीमा भएको थुनछेक बहसपछि भएको आदेशअनुसार रानालाई पुर्पक्षका लागि कारागार चलान गरिएको जिल्ला प्रहरी कार्यालयका प्रवक्ता प्रहरी नायब उपरीक्षक प्रतीक बिष्टले बताए।  धनगढी उप–महानगरपालिका–१० का ३४ वर्षीय रानालाई आइतबार पक्राउ गरि प्रहरीले सोमबार पत्रकार सम्मेलन मार्फत सार्वजनिक गरेको थियो।

     

    गत कार्तिक १ गते नियमित गस्तीमा खटिएका बेला अस्थायी प्रहरी पोष्ट जुगेडाका इन्चार्ज प्रहरी सहायक निरीक्षक गोविन्द बिक र प्रहरी जवान रामबहादुर साउद वेपत्ता भएका थिए। बिक कार्तिक २ गते नेपाल–भारत सीमा भएर बग्ने मोहना नदीमा विभत्स हत्या गरेको अवस्थामा भेटिएका थिए भने २ दिनपछि साउद पनि मोहना नदीमै हत्या गरेकै अवस्थामा फेला परेका थिए। तस्करीको मटरमा प्रहरीले अवरोध पुगाएपछि रानाकै योजना अनुसार उनीहरुको हत्या भएको अनुसन्धानबाट खुलेको प्रहरीले बताउँदै आएको छ।

     

    यसअघि हत्या अभियोगमा पक्राउ परेका ८ जना पनि पुर्पक्षका लागि कारागार चलान भएका छन्। धनगढी–१० का ३१ वर्षीय पर्कु भन्ने रोहित राना (क), रोहित राना (ख), सोही स्थानका २० वर्षीय राजेन्द्र राना, ३० वर्षीय चोर भनिने सुरेश राना कारागार चलान भएका हुन्। यस्तै २५ वर्षीय गब्बर भन्ने राजकुमार राना, २२ वर्षीय रामनिवास राना, २९ वर्षीय टल्लु भन्ने दलराम राना र २५ वर्षीय गोपाल भन्ने रामगोपाल राना पनि कारागार चलान भएको थिए। धनगढीकै मटर व्यापारी राजिव गुप्ता १ लाख ५० हजार धरौटी छुटेका छन्।

    प्रतिक्रिया दिनुहोस


    नयाँ